Mackenzie Bezos, a exesposa do home máis rico do mundo, Jeff Bezos, manterá tras o divorcio o 25% das accións que a parella tiña en Amazon, a empresa que crearon xuntos hai máis de dúas décadas e que é a base da súa fortuna.
Entre os dous dispoñían do 16% dos títulos de Amazon e agora ela controlará o 4%, valorado en 35.000 millóns de dólares (uns 31.000 millóns de euros) e Jeff Bezos quedará o resto, preto dun 12%, valorado agora nuns 107.000 millóns de dólares (algo menos de 96.000 millóns de euros).
Mackenzie Bezos, cuxo apelido de solteira era Tuttle, anunciou o acordo de divorcio polo mesmo medio que comunicou a súa separación o pasado 9 de febreiro tras 25 anos de matrimonio. Nunha mensaxe en Twitter escribiu: “Estou agradecida de terminar o proceso de disolución do meu matrimonio con Jeff, con apoio mutuo e todos os que nos contactaron amablemente, e desexosa de empezar unha seguinte fase como pais e amigos”.