- Para o portavoz popular, Daniel García Cotelo, o sucedido no pleno deste mércores «roza o surrealismo máis esaxerado»
Nun pleno extraordinario celebrado este mércores en Ponteceso a corporación municipal nomeou un avogado e un procurador para defender ao Concello nun proceso orixinado a partir dunha denuncia do propio alcalde. Para o portavoz popular, Daniel García Cotelo, o sucedido este mércores «roza o surrealismo máis esaxerado e entendemos que estaba preparado».
Segundo explica Cotelo, o rexedor Lois García Carballido denunciara ao Concello tras a aprobación, por parte do pleno, de tres mocións que «el considera ilegais». Unha desas mocións responde á creación dunha comisión de investigación para esclarecer as gravacións realizadas no edificio municipal que posteriormente foron difundidas entre a veciñanza. «Os concelleiros da oposición tivemos que nomear a defensa do Concello só porque o alcalde non quere que se investigue a suposta presencia de cámaras ocultas na alcaldía, tal e como se aprobou por maioría nun pleno», denuncia o portavoz do PP, quen asegura que «o ilegal é gravar sen permiso conversacións, non tratar de investigar a veracidade duns feitos».
Os populares piden de novo a intercesión do PSOE provincial e do rexional ao ser «os responsables da situación que se está vivindo o municipio». Insisten en que Carballido non pode seguir gobernando Ponteceso xa que «o mal está sendo para os veciños, que ven como se paralizan obras, como quedan facturas sen aboar e, agora, como teñen que pagar a defensa legal do Concello por culpa do propio alcalde».
Do mesmo xeito, o portavoz do PP en Ponteceso critica que Carballido abrira a posibilidade de que fora a Deputación quen asumira a defensa xurídica do Concello «cando sabe perfectamente que iso é imposible e ilegal ao haber membros da corporación implicados no proceso».