- Este operativo, que este ano se atopa na súa quinta edición, tivo que ser suspendido durante o estado de alarma
A Garda Civil potencia o Plan de Seguridade Xacobea durante a época estival co fin de dar unha protección especial do Camiño de Santiago e garantir a seguridade dos peregrinos. Este operativo, cunha vixencia anual e que este ano se atopa na súa quinta edición, tivo que ser suspendido durante o estado de alarma. Nesta fase de intensificación participarán miles de axentes das diferentes especialidades da Garda Civil en 11 comunidades autónomas.
Durante 2019, a Garda Civil prestou case 24.000 servizos relacionados coa seguridade no Camiño, entre os que destacaron 32 auxilios sanitarios, 37 rescates e 550 inspeccións a establecementos.
A Garda Civil proporciona a protección do Camiño dando prioridade á preservación da seguridade cidadá, a regulación do tráfico, a ordenación do territorio e a protección do patrimonio histórico-artístico e ambiental.
Novidades do Plan de Seguridade
Unha das novidades que presenta esta quinta edición do Plan de Seguridade consiste na campaña de comunicación Gardiáns no Camiño, mediante a cal se distribuíron carteis con consellos de seguridade (en español, inglés e francés) en diferentes puntos do Camiño de Santiago. Esta campaña ponse en marcha coa colaboración da Asociación de Municipios do Camiño de Santiago (AMCS).