- Destacan o tradicional festival de teatro infantil e os concursos de postais, panxoliñas, contos e escaparates
O Concello da Laracha presentou o programa de actividades que se desenvolverá durante o Nadal e que estará centrado en propostas culturais e de ocio especialmente dirixidas ao público infantil e familiar.
A programación arrincará esta semana co tradicional festival de teatro infantil en varios colexios da localidade como o Otero Pedrayo da Laracha, o Alfredo Brañas de Paiosaco e o de Caión. Os días 17, 20 e 21 de decembro todos os nenos de infantil e primaria asistirán á Casa da Cultura da Laracha para presenciar a obra Os tres porquiños, de Educa Teatro.
Despois da fin de semana de Nadal principiarán os eventos dirixidos ao público en xeral que se realizarán nas vilas anteriormente mencionadas. En todos os casos o acceso será gratuíto ata completar o aforo máximo e será necesario usar a máscara facial.
27 de decembro. Tarde de cine: Donkey Xote. Centro sociocultural de Paiosaco, 17:30 horas.
28 de decembro. Teatro infantil: Valente e rebelde, de Trémola Teatro. Casa da Cultura da Laracha, 17:30 horas.
29 de decembro. Espectáculo infantil de sombras: Alén, da Asociación Teatral Paso de Valverde. Centro sociocultural de Paiosaco, 17:30 horas.
30 de decembro. Xogos populares: Os xogos do Paporrubio. Centro comunitario de Caión, 17:30 horas.
3 de xaneiro. Tarde de cine: Dumbo. Casa da Cultura da Laracha, 17:30 horas.
4 de xaneiro. Tarde de cine: Nocturna, unha aventura máxica. Centro comunitario de Caión, 17:30 horas.
8 de xaneiro. Autocine para adultos: Joker. Praza Olonne sur Mer da Laracha, 21:30 horas.
Cabalgata dos Reis Magos
Os días 4 e 5 de xaneiro os Reis Magos realizarán un percorrido nas súas carrozas polas rúas das trece parroquias do termo municipal. Debido á situación sanitaria actual, e do mesmo xeito que sucedeu o ano pasado, non poderá realizarse a habitual festa infantil que organizaba o Concello na véspera de Reis no pavillón do instituto.
Concursos de Nadal
Cabe lembrar que o Concello organiza polo Nadal catro concursos dirixidos a diferentes colectivos.
O certame de panxoliñas ‘María Angeriz Tuset’ realizarase por primeira vez de xeito virtual a través das redes sociais. Esta iniciativa vai dirixida ás asociacións culturais, coros parroquiais e grupos do municipio que deberán enviar un vídeo coa súa canción. Esta gravación subirase ao Facebook municipal o 23 de decembro para que os usuarios voten polas súas favoritas ata o 3 de xaneiro. Tan só por participar cada entidade recibirá 200 euros; mentres que o grupo gañador, aquel que consiga máis gústame por parte dos internautas, conseguirá premios de 400, 300 e 200 euros.
Pola súa banda, o concurso de escaparates alcanza a súa 26ª edición. Desde o Concello convidan a participar a todos os establecementos e locais comerciais da Laracha para que decoren o seu escaparate exterior. Repartiranse un total de 1.800 euros en premios en dúas modalidades: a valoración do xurado e o concurso de Facebook. O prazo para inscribirse remata o martes 21 de decembro e o escaparate deberá estar adornado, sen modificacións, ata o día 6 de xaneiro. Os cinco mellor puntuados polo xurado obterán premios de 500, 400, 300, 200 e 100 euros, respectivamente. Ademais, o concurso de Facebook contará con tres premios de 150, 100 e 50 euros a repartir entre aqueles establecementos que obteñan máis gústame entre o 27 de decembro e o 3 de xaneiro.
Por último, destacan os concursos de postais e contos dirixidos ao alumnado dos colexios Otero Pedrayo da Laracha, Alfredo Brañas de Paiosaco e CEIP de Caión. En ambos casos a valoración realizarase o xoves 16 de decembro, a partir das 11:00 horas, na biblioteca municipal da Laracha. Os premios consistirán en xogos e material educativo.