- Este bloque de pisos situarase na rúa Arxentina e contará con 19 vivendas
O Concello da Laracha recibiu a solicitude de licenza urbanística para a construción dun edificio de 19 vivendas para uso residencial na rúa Arxentina da capital municipal. Trátase da primeira promoción de vivendas en bloque que se presenta no Concello desde o ano 2008 para obter a correspondente licenza.
O proxecto, impulsado por un promotor local, pretende levantar o inmoble nunha parcela que presenta unha superficie de máis de 1.100 metros cadrados. O edificio constaría de planta soto (garaxes e rochos), planta baixa e tres plantas altas máis o aproveitamento do baixo cuberta.
Desde o Goberno local sinalan que no termo municipal da Laracha «estase a rexistrar desde hai anos un continuo e progresivo incremento de poboación, tanto nas zonas urbanas como rurais, que se veu acrecentado coa pandemia do coronavirus». O xurdimento deste tipo de iniciativas «pon de manifesto a existencia de demanda de vivenda», algo que aplauden desde o Concello.