O PP gañou as eleccións en Castela e León, pero os resultados mostran que a súa estratexia de adiantar os comicios foi errada: Alfonso Fernández Mañueco conseguiu 31 procuradores, só dous máis que os que tiña, a súa intención de imitar a Isabel Díaz Ayuso e fagocitar a Ciudadanos, o seu socio ata o de agora, foi un fracaso. Os seus escanos foron a parar a Vox, que pasa dun a 13 procuradores e o seu apoio será indispensable se Mañueco quere repetir como presidente. A extrema dereita xa reclamou a vicepresidencia da Junta. Os populares concibiron o adianto electoral co obxectivo de librarse de Ciudadanos e gobernar en solitario. As súas sondaxes internas, dicían, apuntaban a que podían facerse cos 41 escanos necesarios para lograr a maioría absoluta, pero as súas estimacións foron descendendo segundo se achegaba a data das eleccións, cunha caída máis pronunciada durante a propia campaña. O PSOE perde 7 procuradores e pasa a ser a segunda forza parlamentaria e Ciudadanos máncase e só conserva un procurador dos 12 que tiña. Soria Xa! estréase con 3 procuradores, UPL sae reforzada con 3 procuradores. Por Ávila e Unidas Podemos quedan tamén cun só procurador. Nos próximos días o PP afrontará a situación que vén tratando de evitar hai meses: a construción dunha coalición con Vox.
