A convocatoria xeral de bolsas e axudas ao estudo para o curso 2023-2024 xa está aberta ata o 17 de maio, a través da sede electrónica do Ministerio de Educación e Formación Profesional, pódense solicitar as axudas para estudos postobrigatorios.
Os alumnos e alumnas que vaian cursar bacharelato, Formación Profesional, ensinos artísticos, deportivas, de idiomas ou estudos universitarios, entre outros, poden pedir xa a súa bolsa para o curso que vén. Como na convocatoria anterior, deberán cumprimentar unha serie de datos provisionais, que poderán modificar máis adiante, e deberán facelo aínda que non saiban aínda as notas que obterán este curso, que van estudar no que vén ou se van continuar ou non coa súa formación.
A principal novidade desta convocatoria é o incremento de 1.600 a 2.500 euros nas bolsas de residencia para estudos postobrigatorios, que beneficiará a uns 125.000 alumnos e alumnas. Esta medida terá especial incidencia en familias de contornas rurais cuxos fillos e fillas deben desprazarse a outras localidades para poder estudar.
Grazas a un orzamento récord de 2.520 millóns de euros, estímase que a contía media das bolsas será de 1.730 euros para estudantes non universitarios e 3.130 para universitarios.
Nas próximas semanas anunciaranse tamén as datas da convocatoria de axudas para estudantes con necesidade específica de apoio educativo.