Este mércores abriu o prazo a convocatoria da 13ª edición do programa Parlamento Xove para o curso 2021-22. A conselleira de Política Social, Fabiola García, mantivo un encontro coas mozas e mozos que foron premiados como mellores oradores no curso 2020-21, así co grupo que foi recoñecido como mellor equipo de investigación, onde destacou que esta iniciativa permite que as xeracións máis novas dialoguen, investiguen sobre temas do seu interese e aprendan a escoitar as opinións dos demais. O programa conta con categorías escolares, tanto para a ESO como para Bacharelato, e tamén cunha categoría universitaria na que poden participar os estudantes de grao dos sete campus e das tres universidades galegas.
Os equipos terán de prazo para inscribirse na nova convocatoria ata o 17 de xaneiro a través da páxina web de Xuventude. O programa farase en dúas fases, unha primeira clasificatoria da que xurdirán oito equipos gañadores e que se enfrontarán posteriormente nunha fase final. O tema de debate para esta fase clasificatoria será: Debería existir unha regulación para ser youtuber ou influencer que garanta que desempeñen as súas funcións correctamente?. A concreción da fase final farase pública na web unha vez se supere a fase clasificatoria inicial.