- No ano 2017, só o 25,6% das mulleres con discapacidade se atopaban ocupadas en relación ao emprego
Durante a crise orixinada polo COVID-19, a Asociación de Mulleres con Discapacidade de Galicia (ACADAR) continuou traballando de maneira online e telefónica na promoción do empoderamento e activación para o emprego das mulleres con discapacidade, ademais de realizar asesoramento sobre axudas e medidas adoptadas na situación de estado de alarma.
ACADAR deu continuidade ao programa de Empoderamento e Activación para o Emprego que se desenvolve en Galicia a través dun convenio entre COCEMFE (Confederación de Personas con Discapacidad Física y Orgánica) e o programa Incorpora da Fundación “la Caixa”, tendo como obxectivo contribuír ao empoderamento das mulleres con discapacidade como proceso que fomenta a súa autonomía social e económica e que serve como motor para a activación para o emprego naquelas mulleres con discapacidade en desemprego de longa duración e/ou en situación de maior vulnerabilidade.
Este programa atendeu durante o ano pasado a un total de 117 mulleres galegas con discapacidade, conseguindo a través de itinerarios personalizados que 32 mulleres con discapacidade foran inseridas laboralmente.
A día de hoxe, as mulleres con discapacidade teñen menos recursos económicos derivados da actividade laboral ou procedentes do sistema público de protección social. Segundo o Instituto Nacional de Estatística, no ano 2017, só o 25,6% das mulleres con discapacidade se atopaban ocupadas en relación ao emprego e ademais, as mulleres con discapacidade asalariadas percibiron 8.743,5 euros menos de salario medio bruto anual que os homes sen discapacidade, 3.249 euros menos que os homes con discapacidade e 2.837,2 euros menos que as mulleres sen discapacidade.