O comité de empresa de Alcoa San Cibrao informou de que acordou coa multinacional “a proposta definitiva” para reiniciar as negociacións para a “venda” da planta de aluminio á Sociedade Española de Participacións Industriais (SEPI).
Esa proposta só fai referencia á planta de aluminio, non á de alumina, como expoñía o propio comité na súa última contraproposta, trasladada a finais da semana pasada á dirección de Alcoa. Alcoa comprometeuse co comité de emprea a enviarlle á Sepi no prazo de dúas semanas a súa proposta, a partir da cal empezarán de novo a negociar.
A cambio, os traballadores aceptan levantar a folga indefinida que mantiñan desde o pasado catro de outubro. A negociación durará como máximo tres meses.”As condicións xerais pódense pechar nun día. Logo pasaremos a outra fase en que terán que visitar e revisar a planta. E o acordo final debe chegar antes da Semana Santa”, explica José Antonio Zan, presidente do comité de empresa.