A chanceler alemá, Angela Merkel, despediuse este venres de Bruxelas, ao termo da que seguramente fose o seu último cume europeo, a número 107 nos seus 16 anos como líder de Alemaña e da Unión Europea.
«Este foi quizais o meu último Consello Europeo. Para min sempre foi un pracer», dixo Merkel desde a sala de prensa onde desde 2005 se encargou de explicar o resultado de longas reunións nas que ela foi unha peza fundamental para que os líderes europeos chegasen a un acordo.
A dirixente alemá evitou facer un balance do seu mandato, pero si sinalou que ao longo destes anos tentou « resolver os problemas». Dificultades que se sucederon unha tras outra ao longo de máis dunha década, desde a crise financeira de 2008, pasando pola crise migratoria de 2015, o Brexit ou a pandemia de coronavirus.