As cinzas do volcán Cumbre Vieja obrigaron a cancelar por segunda vez todos os voos na illa por falta de visibildade. Os cambios na dirección e a forza do vento empeoraron a calidade do aire, e xa se nota nas rúas. Os especialistas están a realizar medicións dos gases tóxicos, que se están desprazando cara o interior e xa se concentran na rexión da Palma.
Sergio Rodríguez, investigador do CSIC, asegura que «as concentracións de dióxido de xofre están por encima dos valores máximos que recomenda a Organización Mundial da Saúde».
Un terremoto de 4,3 graos
Ao longo deste xoves rexistráronse máis de sesenta movementos sísmicos. O máis destacado, un terremoto de magnitude 4,3, o máis intenso desde o inicio da actividade volcánica. Produciuse ao mediodía ao suroeste do municipio de Villa de Mazo, a 35 km de profundidade, e sentiuse en varios puntos da Palma. A efusividade do Cumbre Vieja segue estable, aínda que se formaron dúas novas coadas, unha das cales xa cae ao océano. Separouse do leito principal creando o seu propio roteiro que arrasou con máis cultivos de bananeiras, depósitos e algunhas edificacións. Xa hai máis de 430 hectáreas de superficie afectadas pola lava.