O Pleno extraordinario do Consello Interterritorial do Sistema Nacional de Saúde (CISNS) aprobou na súa sesión deste luns subir os límites dos aforos para as competicións deportivas da liga Nacional de Fútbol Profesional e a liga da Asociación de Clubs de Baloncesto (ACB), así como doutros eventos deportivos multitudinarios. Desta forma, pásase dun aforo máximo de ata o 75% ao 85% para eventos en recintos abertos e o aforo máximo de ata o 50% para eventos en recintos pechados pasa a ser do 75%, respectando as medidas non farmacolóxicas de protección fronte á COVID-19. Por outra banda, o pleno do CISNS aprobou a modulación do uso das máscaras en espazos exteriores. A ministra Darias levará ao Consello de Ministros o Real Decreto polo cal as máscaras en espazos exteriores deixarán de ser obrigatorias, algo que será efectivo o vindeiro xoves tras a publicación da medida no Boletín Oficial do Estado. Ademais, o CISNS aprobou recomendar o uso da mesma cando se produzan aglomeracións.
30