Ás 02.07 horas deste sábado a cápsula Orion impactou contra o mar fronte á costa de San Diego, en California. Antes, convertérase nunha bóla de lume, alcanzando unha velocidade de vertixe de máis de 40.200 quilómetros por hora, 30 veces a velocidade do son, e temperaturas de ata 2.700 graos Celsius no seu exterior. Os astronautas enfrontáronse a unha forza de ata case 4 G, é dicir, catro veces por encima da forza de gravidade da Terra, o que levou ao límite os seus corpos. E para acrecentar a tensión, a cápsula estivo incomunicada durante seis minutos tras a súa entrada na atmosfera terrestre. «Houston, desde Integrity [sobrenome da nave Orion], escoitámosvos alto e claro». As palabras de Wiseman, o capitán da tripulación, son as que confirmaron o bo estado dos astronautas tras esta peliaguda manobra, na que calquera mínimo fallo podería ter un resultado fatal. Pouco máis dunha hora despois, xa foran rescatados por un equipo conxunto da NASA e o Exército estadounidense. Foi unha «reentrada de manual» tras un «descenso perfecto», informou a NASA en directo. Nas horas previas á amaraxe, preocupaba a resistencia do escudo térmico, que protexe á nave desta temperatura mortal e que xa deu problemas na misión anterior, Artemis I. Finalmente, resistiu, e será analizada para as futuras misións que leven de novo ao ser humano á Lúa.
8