O Concello informa que o inicio das obras de renovación integral da cuberta da piscina municipal queda aprazado ata o vindeiro mes de marzo.
A decisión adoptouse de acordo coa dirección de obra e coa empresa adxudicataria da execución dos traballos, Construcciones López Cao S.L., debido a que o subministro dos materiais non será posible antes do outono, e non é recomendable executar traballos na cuberta durante esa época nin tampouco no inverno.
Mentres tanto, a piscina municipal seguirá aberta ao público con normalidade, ofrecendo o servizo habitual aos seus usuarios. Unha vez que comecen as obras en marzo, será preciso pechar temporalmente a instalación. O Concello comunicará oportunamente as datas exactas de peche e reapertura para minimizar as molestias.
O Concello investirá 215.000 euros, procedentes integramente de fondos propios municipais, neste proxecto dirixido a mellorar a impermeabilización e a eficiencia enerxética das instalacións para ofrecer un mellor confort aos usuarios.