Bergantiños e Fabril ofreceron un bo espectáculo no amigable disputado este sábado en As Eiroas que terminou con empate a cero. Ambos os equipos disputaron unha primeira metade realmente igualada e con moito ritmo aínda que con poucas ocasións de gol. O filial branquiazul saíu disposto a mandar no terreo de xogo e comezou mellor que o seu rival. Segundo foron avanzando os minutos o choque entrou nunha fase moito máis igualada e cun ritmo alto de xogo pero con pouca profundidade.
Na segunda parte o Bergantiños atopábase algo máis cómodo no terreo de xogo e o Fabril buscaba a Javi Sánchez e Rayco nas bandas. Ao tramo final o Fabril chegou máis fresco, Javi Sánchez tentouno cun disparo que se marchou por encima da meta carballesa. Sarmiento puido anotar o tanto do triunfo para o filial deportivista cun remate de cabeza moi claro que se marchou rozando o pau esquerdo da meta de Canedo.
Mosquera tivo as dúas últimas pero tampouco logrou acertar e o resultado xa non se movería. Con empate a cero chegábase ao final dun encontro interesante e que deixa claro que ambos os equipos estarán a pelexar polas primeiras posicións dentro do grupo A de Terceira División.