O que foi aspirante do PSdeG á Presidencia da Xunta de Galicia e actualmente deputado electo, José Ramón Gómez Besteiro, rexistrou este martes na sede da formación a súa candidatura á Secretaría Xeral co obxectivo de cumprir o seu «compromiso» con Galicia e co partido.
O político lucense acudiu á sede socialista na capital galega para formalizar a súa candidatura no marco dun proceso interno co que o PSdeG renovará a súa dirección e que culminará cun congreso extraordinario o próximo 27 de abril. En declaracións aos medios ante o local do PSdeG, lembrou que, «no seu día», asegurou que o seu «compromiso era con Galicia» e que está a cumprir a súa «palabra». «Fíxeno coa renuncia á acta no Congreso e coa incorporación ao Parlamento de Galicia e, ademais, fágoo agora tamén asumindo ese compromiso con Galicia e co meu partido», indicou.
Na súa intervención, así mesmo, sinalou que, unha vez formalizadas as candidaturas, abrirase o prazo para presentar o seu proxecto á militancia, aos que, no seu momento, «exporá» o seu modelo de partido e a traxectoria política que defende para os próximos catro anos no PSdeG. Preguntado polo equipo do que se rodeará de chegar á Secretaría Xeral do PSdeG e sobre se dará continuidade a membros da actual dirección, Besteiro, comentaba que «Non se trata de dar continuidade ou non, senón de que, cando un ten a responsabilidade de elixir a unha executiva, elixir no momento oportuno aos homes e ás mulleres que poidan facer mellor ese labor para os próximos catro anos», concluíu.