O presidente do Goberno, Pedro Sánchez, e o líder da oposición, Alberto Núñez Feijóo, pactaron este venres que a Comisión Europea supervise as negociacións para renovar o Consello Xeral do Poder Xudicial (CXPX) e para cambiar a lei que regula o sistema de elección dos integrantes do órgano de goberno dos xuíces. Así o anunciaron en senllas roldas de prensa o líder do PP e a voceira do Gobierno, Pilar Alegría, tras a reunión mantida por ambos os líderes no Congreso dos Deputados, a primeira desde que Sánchez foi investido presidente do Goberno.
Pedro Sánchez regalou ao líder do PP ao comezo da súa reunión un exemplar do libro ‘Volver a dónde’, un diario persoal e íntimo da pandemia escrito por Antonio Muñoz Molina a raíz do confinamento.
Segundo Feijóo, a cita “respondeu ás expectativas”: “Podíase esperar moi pouco e conseguimos pouco. Non podo dicir que me sorprenda, pero si que me preocupa”. E engadiu que “para un constitucionalista chegar acordos” con Pedro Sánchez “é moi difícil”.
A voceira do Goberno, Pilar Alegría, lamentou que o líder do Partido Popular “non queira entrar a debater sobre o financiamento autonómico”, que é falar de “servizos públicos”.