- A actuación, que se atopa en proceso de licitación, está cofinanciada polo IDAE cun importe de 757.600 euros
O Concello de Cabana encara o inicio dos traballos de renovación de todo o sistema de iluminación exterior do municipio a través dun proxecto de 1.641.509 euros. A actuación, que se atopa en proceso de licitación, está cofinanciada polo Instituto para a Diversificación e Aforro da Enerxía (IDAE) cun importe de 757.600 euros.
O alcalde, José Muíño, destacou que este plan é «unha das actuacións máis importantes en Cabana dos últimos anos» e permitirá substituír 2.745 dos 3.001 puntos de luz existentes (os restantes xa foran renovados en proxectos anteriores). Será unha renovación «integral que afectará á rede de cables e que permitirá reducir o número de cadros eléctricos», engadiu. Actuarase nas parroquias de Canduas, Borneiro, Cesullas, O Esto, Cundíns, Silvarredonda, Riobó, Nantón, Anos e Corcoesto.
O novo sistema de iluminación contará con tecnoloxía LED, o que conformará unha rede máis eficiente e cun aforro enerxético estimado do 66,93% con maior potencia de iluminación. Un dos obxectivos desta actuación pasa por favorecer o paso a unha economía baixa en carbono no marco do Programa Operativo FEDER de crecemento sostible 2014-2020.