- Na última Xunta de Goberno local tamén foi adxudicado por tres anos o contrato de servizos bibliotecarios
Este luns a Xunta de Goberno Local de Carballo celebrou a última reunión deste 2019, na que foron adxudicados á construtora Vázquez y Reino dous novos proxectos de saneamento que permitirán estender o servizo polas parroquias. O Concello de Carballo investirá, en total, 359.612 euros.
Na parroquia de Sofán está prevista a instalación de case tres quilómetros de rede entre A Piña e Evas, cun custo de 188.881 euros. Así mesmo, destinaranse outros 170.731 euros a levar o servizo aos lugares de O Pinar e Pedra do Sal (Lema), Vilar do Carballo (Oza), Razo da Costa e Santa Mariña (Razo). O prazo de execución das obras é de cinco meses nos dous casos.
Na reunión tamén foi adxudicado por tres anos, prorrogable por un máis, e por un prezo anual de 101.640 euros, o contrato de servizos bibliotecarios municipais á empresa LTM Servicios Bibliotecarios. Así mesmo, aprobouse a prórroga por un ano do contrato do gabinete de comunicación do Concello.
A Xunta de Goberno Local deu luz verde tamén ao pago de facturas por importe de 83.196,02 euros e a varias licenzas urbanísticas, unha delas para a construción dunha nova nave no polígono de Bértoa. Así mesmo, aprobouse a concesión das axudas para actividades de conciliación correspondentes ao verán do 2018 e unha nova convocatoria anual para o 2019 cun crédito de 15.000 euros.