A Xunta de Goberno Local do Concello de Carballo aprobou a concesión definitiva de 180.726,66 euros en subvencións destinadas ao tecido deportivo local, distribuídas en dúas liñas de axudas para financiar a actividade ordinaria dos clubs e asociacións e a organización de eventos e actividades deportivas de carácter extraordinario.
Con esta achega, o Concello continúa apoiando o traballo que desenvolven as entidades deportivas do municipio, tanto na promoción do deporte de base e na formación de novos deportistas como na participación en competicións oficiais e na organización de actividades que contribúen a dinamizar a vida deportiva de Carballo.
A maior parte do investimento, 167.000 euros, destínase ao financiamento dos proxectos de actividade xeral de 19 entidades deportivas. Esta liña de subvencións abrangue unha ampla variedade de disciplinas, entre elas o balonmán, o baloncesto, o fútbol, o voleibol, o hóckey a patíns, a natación, o atletismo, o triatlón, a ximnasia rítmica, o ciclismo, o xadrez, o judo, o karate e o salvamento e socorrismo.
Subvencións para a actividade xeral
As cantidades concedidas definitivamente a cada entidade son as seguintes:
| Entidade deportiva | Subvención |
| Escolas Balonmán Xiria | 25.723,32 € |
| Escola Basket Xiria | 19.807,67 € |
| SD Sofán | 17.401,14 € |
| Agrupación Deportiva Fogar | 16.173,79 € |
| Salvamento y Socorrismo Carballo | 13.104,00 € |
| Escola Lubiáns de Hóckey a Patíns | 12.500,00 € |
| Asociación Deportiva Xiria | 11.750,00 € |
| Escolas de Fútbol Luis Calvo Sanz | 11.530,84 € |
| Club Rítmica Carballo | 7.738,25 € |
| Club Baloncesto Artai | 4.736,49 € |
| SD San Lorenzo de Berdillo | 4.328,32 € |
| Judo Club Bergantiños | 4.047,71 € |
| SD Oza | 3.940,00 € |
| Club Ciclista Carballo | 3.877,63 € |
| Karate-Do Carballo | 3.356,08 € |
| Club Xadrez O Toque Xiria | 3.165,00 € |
| Club Ciclista Monteneme | 1.819,76 € |
| Club Fútbol Cances | 1.000,00 € |
| Virgentis Salvamento Bergantiños | 1.000,00 € |
| TOTAL | 167.000,00 € |
A distribución das axudas realízase de acordo cos criterios de valoración establecidos nas bases da convocatoria, tendo en conta os proxectos presentados polas entidades.
Organización de competicións e eventos
A segunda liña de subvencións, dotada con 13.726,66 euros, permitirá colaborar no financiamento de 11 actividades deportivas de carácter extraordinario promovidas por entidades locais.
As subvencións concedidas son as seguintes:
| Entidade e actividade | Subvención |
| AD Fogar. IV Memorial Pedro Luis Fernández | 1.500,00 € |
| Club Fútbol Cances. II Torneo Internacional Veteranos Costa da Morte | 1.500,00 € |
| Club Rítmica Carballo. II Torneo Club Rítmica Carballo | 1.275,00 € |
| Club Rítmica Carballo. IV Gala Nadal Rítmica Carballo | 960,00 € |
| Club Rítmica Pangea Carballo. Festival de Inverno de Ximnasia Rítmica | 1.495,00 € |
| Club Xadrez O Toque Xiria. III Torneo Escolar Concello de Carballo | 1.120,00 € |
| Club Xadrez O Toque Xiria. IX Aberto Concello de Carballo Clásico | 1.500,00 € |
| Judo Club Bergantiños. Campionato do Nadal 2026 | 1.500,00 € |
| Salvamento y Socorrismo Carballo. XXX Memorial Carlos Servando | 1.500,00 € |
| SD Oza. VI Triangular SD Oza | 420,00 € |
| SD Oza. I Oza Cup | 956,66 € |
| TOTAL | 13.726,66 € |
Estas iniciativas contribúen a ampliar a oferta deportiva municipal, fomentar a participación e favorecer o encontro entre deportistas, clubs e afeccións de diferentes procedencias, ademais de reforzar a proxección de Carballo como sede de competicións deportivas.
Máis recursos para o deporte local
A concesión definitiva das subvencións incorpora un incremento de 2.726,66 euros respecto das dotacións inicialmente previstas para estas dúas liñas de axudas. Este incremento é posible grazas á redistribución de fondos que quedaron dispoñibles tras a resolución doutra convocatoria municipal destinada á participación e organización de fases finais de ascenso a competicións nacionais e campionatos de España.
Deste xeito, o Concello aproveita os recursos existentes para ampliar o apoio económico ás entidades deportivas e favorecer que os fondos públicos destinados ao fomento do deporte repercutan directamente na actividade dos clubs.
O concelleiro de Deportes, Daniel Barreiro, destaca a importancia de manter unha colaboración estable coas entidades que desenvolven a súa actividade no municipio, tanto polo seu papel na formación deportiva como pola súa contribución á participación social, á convivencia e á promoción de hábitos de vida saudables.
A través destas convocatorias, o Concello de Carballo reafirma o seu compromiso cun modelo deportivo plural, participativo e accesible, no que os clubs e asociacións desempeñan un papel fundamental para achegar a práctica deportiva á veciñanza de todas as idades.
