33
Un veciño de Carballo de avanzada idade puxo en albas ás forzas da orde na tarde deste xoves ao atrincheirarse, presuntamente armado, na súa vivenda, un piso da céntrica rúa da Igrexa. Ao aviso dunha veciña que afirmou oír como petardos, acudiu a Garda Civil, a Policía Local e unha ambulancia do 061. O home, nun primeiro momento, non accedeu ás chamadas das forzas da orde, pero máis tarde acabou entregándose, sendo evacuado en ambulancia a un centro sanitario. Investígase se os ruídos escoitados pola persoa alertante poderían ser disparos dunha arma que o morador custodiaba na vivenda.