A Consellería de Cultura, Educación e Universidade vén de convocar o programa Bibliotecas Escolares Solidarias para o curso 2020-21, que se estrutura en tres accións específicas: o Voluntariado de lectura-A (para a etapa de Primaria), o Voluntariado na biblioteca escolar (dirixido a Secundaria) e o Selo Biblioteca Escolar Solidaria.
O obxectivo destas accións, ás que poderán adherirse os centros escolares públicos que o desexen, é estimular o voluntariado cultural en relación coas bibliotecas e a lectura entre o alumnado dos niveis non universitarios e as súas familias; así como avanzar na inclusión, no acceso igualitario ao coñecemento e aos recursos culturais e de aprendizaxe.
No pasado curso 2019/2020 participaron en Voluntariado de lectura un total de 2.638 alumnos e alumnas de primaria, e na iniciativa Voluntariado na biblioteca escolar, 1.105 alumnos e alumnas de secundaria, o que fala do alcance desta iniciativa.