O Movemento 5 Estrelas, un dos principais partidos da coalición, abstívose na votación da moción de confianza ao primeiro ministro, Mario Draghi, no senado. Os senadores da agrupación política abandonaron a sala no momento da votación, retirando o seu apoio ao xefe do Executivo e creando unha crise de Goberno. Con todo, a moción saíu adiante con 172 votos a favor e 39 en contra. Tratábase de aprobar unha axuda de 26.000 millóns de euros para paliar os efectos da inflación, un monto que o Movemento 5 Estrelas considera insuficiente. A moción de confianza é unha ferramenta política utilizada en Italia para acelerar a tramitación parlamentaria xa que evita a imposición de emendas.
O primeiro ministro reuniuse este xoves co presidente da República, Sergio Mattarella, para buscar unha solución á crise. Pouco despois, reunido o Consello de Ministros, anunciou a súa dimisión. Aínda que ten apoio suficiente para seguir no Goberno, Draghi xa asegurou que o seu Executivo de unidade nacional só tería sentido co M5S. O Movemento 5 Estrelas consideraba que a partida para controlar a inflación é insuficiente. O partido tamén tivo encontróns con Draghi ao negarse a enviar máis armamento a Ucraína. Algúns analistas sosteñen que se trata dun movemento da formación para contentar ao seu electorado de fronte ao final da lexislatura en marzo de 2023.
O presidente da República italiana non acepta a dimisión do primeiro ministro Draghi
O presidente da República italiana, Sergio Mattarella, non aceptou hoxe a dimisión do primeiro ministro, Mario Draghi, e encargoulle presentarse ante o Parlamento para verificar se segue contando cunha maioría para gobernar.