Como consecuencia do impacto, un dos axentes tivo que ser excarcerado polos Bombeiros de Ordes e outro resultou ferido. O accidente tivo lugar preto das seis da madrugada deste sábado cando ambos os vehículos circulaban pola N-634, á altura do punto quilométrico 687. Foi o propio camioneiro, que transportaba lácteos, quen chamou ao 112 Galicia para informar da colisión e solicitar asistencia médica urxente para os ocupantes da patrulla.
Na comunicación cos xestores de emerxencias, o alertador indicaba que a colisión produciuse na estrada que une Guitiriz e Santiago, ao seu paso pola parroquia de Céltigos.
De inmediato, os xestores do 112 puxeron a situación en coñecemento dos profesionais de Urxencias Sanitarias de Galicia-061, dos Bombeiros de Ordes e dos membros do GES de Curtis.
Unha vez no lugar, os efectivos do Servizo de Prevención Extinción de Incendios e Salvamento informaron ao 112 que foi necesario empregar o material de excarceración para liberar a un dos axentes. Finalmente, os dous feridos foron evacuados polo equipo sanitario en ambulancia ao centro hospitalario de referencia.
Ata o lugar tamén acudiu o persoal do servizo de mantemento das estradas, co fin de restablecer as condicións de seguridade na vía.