Un incendio declarado nun bote do Club Náutico de Camariñas provocou danos materiais en dúas embarcacións, sen ningunha persoa que resultase ferida. Os feitos tiveron lugar ao fío das 04:30 horas da madrugada deste luns.
Nese momento, diversos particulares contactaban co Centro Integrado de Atención ás Emerxencias (CIAE)-112 Galicia para dar conta do incendio nunha embarcación. Nada máis recibir o aviso do lume, o persoal do 112 Galicia requiriu a intervención dos Bombeiros de Xallas e de Bergantiños, dos membros do GES de Ponteceso, dos axentes da Garda Civil e de Protección Civil de Camariñas.
Con todo, e unha vez sufocado o lume, os medios desprazados ata o punto, informan ao CIAE 112 Galicia que, a maiores do bote no que se iniciou o incendio, tamén se viu afectado polas lapas un veleiro que se atopaba preto.