35
España conquistou este domingo nos penaltis ante Croacia a Nations League, un título que se logra no inicio dun novo ciclo. Croacia foi un óso duro de roer. A selección española foi mellor na prórroga, pero non foi capaz de atopar unha físgoa na férrea defensa balcánica. Os penaltis eran a última opción e os últimos precedentes nas quendas fatídicas falaban croata. Pero entón apareceu Unai Simón. O meta español, que nos momentos clave axigántase como certo homólogo seu de nome Iker Casillas, detivo dúas penas máximas para erixirse como o heroe da noite. O porteiro do Athletic corrixiu o erro de Laporte na quenda e entregoulle a gloria en bandexa de prata a Carvajal, que non fallou para dar a España a súa primeira Nations League.