Os servizos de emerxencias desaloxaron dous edificios completos a causa dunha fuga de gas na Rúa Rosalía de Castro, en Verín.
O CIAE-112 Galicia tivo constancia deste suceso tras a chamada dun particular alertando de que percibía un cheiro a gas. De inmediato, os xestores do 112 Galicia pasaron o aviso a Urxencias Sanitarias de Galicia-061, aos Bombeiros de Verín, á Garda Civil, aos membros de Protección Civil e aos técnicos da empresa subministradora do gas.
Así, tras o desaloxo preventivo das vivendas, os servizos de emerxencias realizaron as comprobacións apropiadas para localizar a fuga. Segundo puido confirmarse, esta orixinouse polo mal estado de dous reguladores de gas, os cales foron pechados e os veciños puideron voltar aos seus domicilios.