O 112 Galicia tivo constancia do ocorrido a través da chamada dun particular que solicitaba asistencia sanitaria urxente para un home que presentaba síntomas de intoxicación. Segundo indicou, a vítima fora revisar un xerador e foi atopada inconsciente.
O suceso produciuse na Avenida do Médico Paz García, na parroquia de Nogueira, no concello de Meis, arredor das 08:45 horas.
De inmediato, desde o Centro Integrado de Atención ás Emerxencias 112 Galicia solicitouse a intervención do Servizo de Urxencias Sanitarias de Galicia-061, dos axentes da Garda Civil e dos Bombeiros de Ribadumia.
Malia os esforzos dos equipos de emerxencias, nada se puido facer por salvarlle a vida ao home. No lugar do suceso rexistrouse unha elevada concentración de monóxido de carbono.