34
Unha condutora sofre lesións importantes a causa dun accidente co seu vehículo en Marrozos, Santiago, preto da gasolineira de Santa Lucía. Segundo a información recollida no 112 Galicia, o sinistro produciuse pasadas as once da noite deste venres na N-525.
O turismo no que viaxaba a ferida envorcou e ela mesma saíu do coche antes da chegada dos Bombeiros de Santiago, a pesar de que tiña un brazo atrapado, segundo varias testemuñas. A vítima tamén presenta unha lesión importante nunha perna.
A muller foi atendida polos profesionais de Urxencias Sanitarias de Galicia-061, cuxa dotación acudiu ao lugar do accidente xunto cos axentes da Garda Civil de Tráfico.