O Museo do Pobo Galego acolleu a centos de persoas que acudiron este venres a render homenaxe a Xosé Manuel Beiras, falecido esta quinta feira aos 90 anos de idade. Os 20 minutos de aplausos ininterrompidos que acompañaron a saída do féretro do Museo até que o coche fúnebre arrancou con destino ao cemiterio de Boisaca puxeron o ramo a unha xornada de emocións plenas, de lembranzas e de compromiso.
A darlle o adeus acudiron políticos de diversas cores (tamén uns cuantos representantes do PP), expresidentes da Xunta como os socialistas Fernando González Laxe e Emilio Pérez Touriño; xente da cultura e a universidade da que foi catedrático; e moitos admiradores. O acto final, atravesado polos versos de Miguel Anxo Fernán Vello, escritor e exdeputado no Congreso, e a música do seu amigo Luís Soto á frauta, rompeu en aplausos varias veces.
En todo caso, a maior ovación de todo o público que non logrou sitio dentro e esperou na rúa alongouse ata 26 minutos, xa co féretro montado no coche para ser trasladado ao cemiterio municipal de Boisaca. Esa case media hora de palmas terminou con berros nas gargantas e moitos puños no alto: “Beiras, amigo, Galiza está contigo”, “Galiza ceibe, poder popular!”, entre aplausos e bágoas de moitos dos asistentes.
Tamén entre bágoas, atendeu aos medios o músico e escritor Antón Reixa para pedir levar a Beiras ao Panteón de Galegos Ilustres. «Marcha cando sabe que o que vén é un horror», avisou.