O conselleiro de Sanidade, Julio García Comesaña, afirmou este domingo que o posible peche perimetral de Galicia de cara á ponte da Constitución “está enriba da mesa” do comité clínico e “non está descartado”, aínda que a decisión de momento “non está pechada”. Así mesmo, lembrou que diversos municipios chegarán a esa ponte coas maiores restricions, o que inclúe a prohibición de entradas e saídas.
“Na ponte de Todos os Santos non pechamos Galicia e non tivemos grandes problemas”, afirmou o conselleiro. “Daquela, case todas as comunidades autónomas tiñan as súas limitacións de mobilidade. A situación é semellante á da Ponte de Todos os Santos, pero repito, a cuestión está enriba da mesa e non está tomada a decisión de pechar perimetralmente ou mantela como está agora”, engadiu Comesaña.