A Cidade da Cultura de Galicia celebrou na tarde deste xoves unha homenaxe a clubs de fútbol galegos pioneiros, dentro do programa de actividades co que se arroupa a exposición Valor e mestría. Galicia como fútbol, que acolle o Museo Centro Gaiás ata o 1 de setembro deste ano.
Coñecer xestas e fitos de equipos galegos, algún deles centenarios, non é só darlle o seu sitio na historia, senón tamén un xeito efectivo de achegarlles aos máis novos as lendas, logros e mitos destas formacións, á vez que a descuberta dun xeito ameno e entretido dun anaco da historia galega a través deste deporte.
Para rememorar e dar a coñecer eses momentos de gloria do fútbol galego contouse coa presenza de representantes dalgúns dos clubs de fútbol galegos máis antigos. A xornada, estivo moderada polo xornalista Carlos Miranda, e contou coas intervencións de representantes do Real Club Deportivo da Coruña, do Real Club Celta de Vigo, da Unión Campestre FC, do Racing de Ferrol e do Club SD Sin Querer.