A intervención xa en marcha está sendo realizada ao abeiro dun convenio de colaboración da consellería de Cultura coa Universidade de Vigo mediante o cal un equipo de investigadores afondarán durante un mes nos restos do xacemento. En concreto, os traballos inclúen a retirada de tapados antigos, a realización de sondaxes arqueolóxicas e a escavación de tumbas con restos óseos humanos. O proxecto complétase coa roza e limpeza de estruturas e con labores de conservación e consolidación no xacemento. O conselleiro de Cultura, Educación, FP e Universidades, Román Rodríguez, e o reitor da Universidade de Vigo, Manuel Reigosa, visitaron este venres esta zona arqueolóxica de Adro Vello coa intención de poñer en valor este conxunto sito xunto á praia do Carreiro.
21