O director comercial de Alimentación de Carrefour, Jorge Ybarra; o responsable do proxecto Blockchain de Carrefour, Enrique Pérez, e o director xeral de Ordenación Pesqueira e Acuicultura do Ministerio de Agricultura, Pesca e Alimentación, Juan Ignacio Gandarias Serrano, presentaron este martes o “primeiro sistema do mundo de trazabilidade alimentaria blockchain para peixe fresco”, segundo Ybarra.
Trátase dun fito tecnolóxico que se aplica á pescada de petisco con márca ‘Calidade e Orixe’, que dá continuidade ao proceso iniciado o pasado mes novembro, cando Carrefour comezou a aplicar o blockchain ao polo campero criado sen tratamento antibióticos, que xa representa o 10% das vendas totais de polo na compañía. Grazas a un código QR presente na etiquetaxe da pescada de petisco, o consumidor pode coñecer toda a información relativa ao produto, desde o barco que realizou a captura e as coordenadas da zona de pesca ás artes empregadas e a localización da lonxa, pasando polos labores de acondicionamento e a data de entrega a Carrefour. Todas as pescadas de petisco, que son trazadas unha a unha, están dispoñibles en 24 horas en calquera centro da compañía procedentes da lonxa de Celeiro (Lugo).
Transparencia absoluta
“O desenvolvemento deste produto confírmanos como referentes no uso do blockchain alimentario, xa que é a primeira vez que se emprega esta tecnoloxía para garantir a trazabilidad do peixe fresco”, explica Ybarra, destacando que “ofrecemos unha transparencia absoluta”. O propósito de Carrefour para o curto prazo é estender a tecnoloxía blockchain a outras seccións de frescos, como froitería e charcutería; de feito, Jorge Ybarra anunciou que o próximo mes de outubro presentarase un novo proxecto coas laranxas de tempada.
E vai máis aló: “A nosa idea é que o blockchain estea presente en todos os produtos que comercializamos con márca ‘Calidade e Orixe’, aínda que dependemos dos desenvolvementos tecnolóxicos”. Actualmente, Carrefour está a traballar en, aproximadamente, 40 proxectos de ‘Calidade e Orixe’, que engloban ao redor de 200 referencias.
Incremento do consumo
“A trazabilidad sempre existiu, pero agora poñémola a disposición do cliente cunha forte aposta pola transparencia”, terza Enrique Pérez, recalcando que con este proxecto “ofrecemos transparencia, frescura e certificacións”. Así mesmo, tamén se destaca que as vendas do polo campero “están a evolucionar moi ben”, segundo salienta o responsable do proxecto Blockchain de Carrefour, subliñando que, grazas á transparencia que ofrece esta tecnoloxía, “increméntase a confianza do consumidor e auméntase o consumo”. Finalmente, o xerente de Novomar (empresa comercializadora do Grupo Porto Celeiro), Fernando Bouza, recalca que “o blockchain aplicado á nosa pescada supón o achegamento total entre barco e distribuidor final, ofrecendo transparencia, fiabilidade e total información ao consumidor”.