- O accidente produciuse ás 10:45 deste martes preto da rotonda de Paraugas
Os servizos de emerxencia tiveron que intervir na mañá deste martes para liberar a unha persoa despois de ser atropelada e quedar atrapada debaixo do vehículo.
O accidente tivo lugar ás 10:45 horas na estrada que une O Temple e A Barcala, moi preto da rotonda do Paraugas. Foi a esa hora cando varios particulares chamaban ao 112 Galicia para dar conta do sucedido e solicitar asistencia médica urxente para a persoa ferida.
Así, desde o Centro Integrado de Atención ás Emerxencias de Galicia avisouse aos profesionais sanitarios, que enviaron unha ambulancia medicalizada para a atención do ferido para o seu posterior traslado ata o centro hospitalario de referencia.
No operativo tamén participaron os Bombeiros de Arteixo, e axentes da Policía Local e do Servizo Municipal de Emerxencias da localidade, quen finalmente liberaron o ferido.