As últimas tres fins de semana deste mes de maio (14-15, 21 e 28) o territorio do proxecto RIMARTES acolle o I Campionato de Fotografía Submarina en Pecios para continuar coas accións de promoción do noso patrimonio subacuático e do mergullo recreativo. O concurso conta co patrocinio da Deputación da Coruña, dos Concellos de Malpica, Fisterra e Porto do Son e co apoio técnico da FEGAS (Federación Galega de Actividades Subacuáticas).
O I Campionato de Fotografía Submarina en Pecios RIMARTES é un concurso aberto á participación de mergulladores en posesión da correspondente licenza e permisos para a práctica de mergullo autónomo, así como do seguro federativo en vigor. Poden participar mergulladores recreativos con equipos profesionais e tamén con cámaras GoPro.
As inmersións realizaranse a través dos 6 centros de mergullo colaboradores de RIMARTES: Buceo Galicia, Deepteam Coruña, Nauga (todos con sede na Coruña), Buceo Malpica, Buceo Finisterre e Mergullo Compostela (con base en Porto do Son).