Segunda masacre en menos de dous meses nun cárcere de Ecuador. Polo menos 58 presos morreron e unha ducia resultaron feridos durante unha liorta entre reos nunha prisión de Guayaquil, no suroeste do país. A violencia estalou no pavillón dous do centro por unha disputa de liderado, despois de que un xefe fose posto en liberdade recentemente, segundo o comandante xeral da Policía.
As familias, angustiadas, consultaban este sábado as listas de falecidos, coa esperanza de non atopar o nome do seu ser querido. As prisións ecuatorianas están baixo estado de excepción desde o 29 de setembro por mor do brutal asasinato de 118 presos noutro enfrontamento nun cárcere de Guayaquil, o peor rexistrado nunca no país. Pese ao estado de excepción, os altercados seguiron nos cárceres. Nas últimas semanas apareceron colgados varios reos e o 1 de novembro unha rifa entre bandas deixou tres falecidos.