O proxecto de lei de emerxencia que o Goberno de Javier Milei enviou ao Congreso da Nación afectará a case todos os ámbitos da economía, a política e a sociedade de Arxentina, e permitirá que se deleguen facultades lexislativas no poder executivo baixo o pretexto dunha emerxencia múltiple.
A chamada lei de «bases e puntos de partida para a liberdade dos arxentinos» chega unha semana despois da firma do polémico decreto de necesidade e urxencia (DNU) para desregular a economía, incluíndo a derogación de varias leis, unha medida que desatou protestas e é obxecto de presentacións ante a Xustiza.
De aprobar o proxecto, os lexisladores do Congreso permitirán que o Executivo declare a emerxencia pública en materia económica, financeira, fiscal, social, previsional, de seguridade, defensa, tarifaria, enerxética, sanitaria e social ata, polo menos, o 31 de decembro de 2025. A emerxencia poderá prorrogarse por dous anos, o cual abarca todo o mandato de Milei.
En total, o Goberno propón unha lei que reformará, eliminará ou engadirá 664 artigos legais. Con este proxecto, o ultraliberal Javier Milei busca obter amplas facultades para tomar decisións sen necesidade de aval lexislativo, baixo o paraugas dunha declaración de «emerxencia pública».