- Grazalema, en Cádiz, rexistrou 390 litros por metro cadrado entre a medianoite e as 16.30 horas deste mércores.
A borrasca Leonardo obrigou en Andalucía ao desaloxo de máis de 3.000 persoas en distintos puntos de Cádiz, Málaga e Xaén, nun contexto de enchentes de ríos e risco de inundacións que mantén en alerta máxima a esta comunidade autónoma. O conselleiro andaluz de Presidencia, Antonio Sanz, pediu extremar a precaución, evitar cruzar calquera leito e limitar os desprazamentos aos estritamente imprescindibles. Tamén confirmou que actualmente hai seis ríos en nivel vermello e 18 en nivel laranxa, e non descartou que, se continúan as choivas, poderían ser necesarios novos desaloxos en áreas de risco. Neste sentido, o presidente da Junta de Andalucía, Juanma Moreno, advertiu de que o incumprimento das ordes de desaloxo ditadas polas Forzas e Corpos de Seguridade poderá carrexar multas. «Non son recomendacións, son instrucións», subliñou. No operativo participan ao redor de 1.200 efectivos da Axencia de Emerxencias de Andalucía (EMA) e do Infoca, ademais de 400 militares da Unidade Militar de Emerxencias (UME), xunto a axentes da Garda Civil e outros corpos de seguridade.