O delegado do Goberno en Galicia, José Miñones, constatou o “gran impacto e enorme acerto” que está a supoñer a decisión do Goberno de bonificar ao 100% todos os abonos de tren de Media Distancia, Proximidades e Avant en Galicia. Nun acto na estación de ferrocarril de Santiago, o delegado informou de que Renfe despachou xa máis de 28.000 abonos gratuítos en Galicia e que reforzou un 30% as prazas, con 14.000 máis. “Miles de familias en Galicia están a beneficiarse xa desta medida do Goberno para paliar a inflación e os efectos da crise enerxética derivada da guerra de Putin”, valorou José Miñones. O delegado realizou a viaxe de tren entre Santiago e Ourense, para supervisar a posta en marcha da gratuidade dos trens Avant aprobada no Consello de Ministros do pasado martes. En cada estación, estivo acompañado pola subdelegada do Goberno na Coruña, María Rivas, e o subdelegado en Ourense, Emilio González, respectivamente. “O Goberno toma medidas para protexer á familias e as súas economías”, remarcou o delegado.