Un estudante de 13 anos do instituto Julio Prieto Nespereira, ubicado no barrio de O Vinteún en Ourense, morreu este mércores tras derrubarse o muro do vestiario deste centro cando el saía de Educación Física, no que cursaba o terceiro curso da ESO.
Segundo informaron fontes da investigación, o tráxico suceso ocorreu sobre as dúas da tarde, cando se veu abaixo a parede que separa os armarios das duchas, derrubamento a consecuencia do cal o adolescente quedou atrapado. Outro mozo, con lesións no nocello, foi levado ao hospital. Até o lugar desprazáronse efectivos de Bombeiros, e das Policías Local e Nacional, quen acordoaron a zona; así como psicólogos que prestaron asesoramento e apoio á comunidade educativa.
A titular do xulgado de instrución número tres de Ourense, en funcións de garda, autorizou o levantamento do cadáver, ordenando a realización da autopsia. Tamén, segundo informou o Tribunal Superior de Xustiza de Galicia, acordou un informe técnico sobre o estado do muro e unha reportaxe fotográfica completo, á parte do mencionado precinto da zona ata que se determine que pasou.