O alumnado do obradoiro de emprego ‘Camiño ao Emprego’ comezou nos últimos días os traballos de mellora na escola de Senande, en Muxía. Ademais, durante a vindeira semana estarán levando a cabo tarefas de limpeza, mellora e acondicionamento no parque e meredeiro de Viseo.
A IV edición do obradoiro dual de emprego «Camiño ao Emprego 2022» posto en marcha polos Concellos de Vimianzo, Muxía e Camariñas o pasado mes de outubro continúa co seu plan de proxectos de revestimento e restauración.
Nesta ocasión, un total de 20 alumnos e alumnas desenvolven o seu labor de xeito simultáneo nos tres concellos, sendo Vimianzo promotor, dentro das especialidades de ‘Operacións auxiliares de revestimentos continuos en construción’ e ‘Montaxe de mobles e elementos e carpintería’.
Os tres primeiros meses concentraron a parte teórica dos correspondentes certificados de profesionalidade xunto coa formación obrigatoria en prevención de riscos laborais e agora xa están comenzando coas tarefas prácticas.
Esta cuarta edición é un fito histórico porque, ata o pasado ano, ningún municipio fora quen de acoller catro obradoiros deste tipo.