O Bloque Nacionalista Galego solicitará á concellaría de Fomento que garanta a accesibilidade ao centro de saúde de Lavadores mentras duran as obras de instalación das ramplas mecánicas. Así o anunciou o Portavoz municipal do BNG de Vigo, Xabier P. Igrexas, tras comprobar in situ as dificultades denunciadas pola veciñanza e que motivaron varias queixas ao Concello.
Este mércores varias persoas non puideron acceder ao centro de saúde por causa da maquinaria de obra que ocupaba o vial de acceso con Ramón Nieto e polo estado impracticábel da beirarrúa, esvaradiza pola abundante presenza de lama. Isto impediu mesmo que unha anciá con mobilidade reducida puidese acudir a vacinarse.
Desde o BNG critican que este caso volve evidenciar a falla de supervisión e seguimento das obras públicas por parte do Concello.