O verán xa está aquí, e Galicia xa ten a súa banda sonora oficial: O chirimbolo, un merengue pegadizo interpretado pola mítica orquestra Los Satélites, foi elixido como a Canción do Verán 2025 pola Corporación Radio e Televisión de Galicia (CRTVG). O tema, con sabor a verbena e ritmo tropical, acompañará aos galegos nas festas populares, na programación da Televisión de Galicia e nas ondas da Radio Galega durante toda a tempada estival.
O fallo do xurado, composto por profesionais da CRTVG como Fernando R. Ojea, Montse Besada e Natalia Penas, e artistas como Roi Casal e Carolina Rubirosa, destacou a calidade musical das propostas finalistas, así como o esmero crecente na produción dos videoclips.
Tras unha meditación complicada, finalmente o xurado decantouse pola vitalidade festiva dos Satélites, que volven así a reafirmarse como un referente indiscutible da música popular e da verbena galega. O director actual da orquestra Los Satélites é Francisco Javier Saavedra Ces, quen leva a batuta desde 1986.
O chirimbolo, é unha declaración de intencións: ritmo áxil, letra divertida e un retrouso que se pega á primeira escoita. En clave de merengue, o tema inspírase no humor cotián e as situacións típicas do verán galego, converténdose no acompañamento ideal para as noites de festa ao aire libre.
O videoclip destaca tamén pola súa realización coidada, á altura do renovado nivel técnico e estético das orquestras galegas. A produción suma puntos a un tema que, sen dúbida, está chamado a converterse nun dos máis escoitados do verán en Galicia.