O Concello de Cerceda acaba de abrir as convocatorias das axudas económicas de apoio á natalidade para os anos 2021 e 2022. Ambas as bases están publicadas no Boletín Oficial da Provincia do 29 de decembro de 2021.
Deste xeito, habilítanse subvencións de ata 300 euros por filla ou fillo nado, adoptado ou acollido entre o 1 de xaneiro e o 31 de decembro do 2021 e no mesmo período do 2022.
Tanto as persoas beneficiarias da liña de axudas como os/as menores obxecto da subvención deberán figurar como empadroados/as en Cerceda e comprometerse a seguir figurando neste rexistro dous anos máis desde a inscrición do menor no padrón municipal.
O prazo de solicitudes estará aberto desde o 30 de decembro do 2021 ata o 31 de xaneiro do 2023. Poderanse tramitar preferentemente a través da Sede Electrónica ou de xeito presencial no Rexistro do Concello.
O principal obxectivo do Concello, segundo explicou a concelleira de Servizos Sociais, Catrina Queijo, pasa por “asegurar a retención poboacional no municipio e fomentar o incremento na cifras de natalidade”. “Cerceda goza dunha contorna ideal para o crecemento dunha familia, con todos os servizos e comodidades á súa disposición”, engadiu.