Tras meses de negociacións e con acordos de última hora o Congreso aprobou este xoves a lei de amnistía. A maioría absoluta da Cámara Baixa aceptou o texto da norma coa que o Goberno quere recuperar “a concordia” en Catalunya, en palabras do presidente do Goberno, Pedro Sánchez. A lei vai agora camiño do Senado, onde a maioría absoluta do PP tentará atrasala e zancadilleala todo o que poida, aínda que a Cámara Alta non pode tombar a norma. Con todo, deberá volver ao Congreso, que poderá ser aprobada xa definitivamente con maioría simple, e entrará en vigor previsiblemente a finais de maio.
A votación da chamada ‘Lei Orgánica de amnistía para a normalización institucional, política e social en Cataluña’ saíu adiante con 178 votos a favor, 172 en contra e ningunha abstención. A lei, que foi posible tras o acordo alcanzado a semana pasada entre o PSOE, Junts e ERC, adáptase tras os últimos cambios ao dereito europeo co fin de blindar as causas de ‘Tsunami’ e os CDR. O texto borra toda responsabilidade penal, administrativa e contable das persoas implicadas no ‘procés’ durante doce anos e abre a porta ao regreso a España do expresidente catalán Carles Puigdemont.