Os casos de COVID-19 rexistraron un importante repunte nas últimas semanas en España, segundo os datos recollidos polas redes de vixilancia epidemiolóxica, que evidencian que as mostras positivas por coronavirus superan ás de gripe e virus respiratorio sincitial (VRS). Con todo, a maioría dos casos son leves, polo que non está sobre a mesa retomar medidas excepcionais.
Aínda que resulta imposible cuantificar o novo repunte na súa verdadeira dimensión, xa que tras o fin da crise sanitaria abandonouse en gran medida a realización de probas diagnósticas, trataríase dunha tendencia global. A OMS sinalou que ao longo do mes de agosto houbo un incremento do 38% no número de casos que foron reportados a nivel mundial, un escenario que se mantivo durante setembro, tamén en España, onde nas últimas semanas a venda de test de antíxenos nas farmacias disparouse.
Os especialistas lembran que, tanto en España como no resto da Unión Europa, a situación é estable debido á alta inmunización da poboación, aínda que recomendan non baixar a garda, especialmente as persoas máis vulnerables. Por este motivo, a Comisión de Saúde Pública decidiu adiantar á última semana de setembro a campaña de vacinación conxunta contra a gripe e a COVID-19.