«É o momento de abandonar». Nunha carta remitida ao ministro de Xustiza asegura que respecta profundamente as resolucións xudiciais.
Álvaro García Ortiz presentou este luns a súa dimisión como fiscal xeral do Estado, tras coñecerse a condena do Tribunal Supremo a dous anos de inhabilitación. O pasado xoves o Tribunal Supremo adiantou o fallo da condena a García Ortiz por revelar datos do caso de fraude fiscal de Alberto González Amador, noivo da presidenta da Comunidad de Madrid, Isabel Díaz Ayuso, sen concretar máis detalles. Impoñíaselle unha pena de dous anos de inhabilitación para o cargo de fiscal xeral do Estado, así como unha multa de 7.200 euros. Tamén tiña que indemnizar a González Amador a 10.000 euros e a facerse cargo das costas do xuízo. Aínda que a sentenza é firme, unha vez que se coñeza a mesma cos argumentos para a condena, García Ortiz poderá solicitar un incidente de nulidade ante o Supremo, e despois, se é rexeitado, poderá recorrer ao Tribunal Constitucional.