O ministro do Interior, Fernando Grande-Marlaska, activou a Rede de Coordinación para a Seguridade en Procesos Electorais, que se ocupará de adoptar todas as medidas necesarias para garantir a seguridade das próximas eleccións municipais do 28 de maio.
Esta rede creouse para os anteriores comicios de 2019 no marco das medidas impulsadas pola Unión Europea para garantir a seguridade dos procesos electorais europeos. O seu obxectivo, segundo explicou Grande-Marlaska ao comezo da reunión celebrada no Ministerio do Interior, é «impulsar medidas equilibradas, globais e específicas encamiñadas a apoiar a integridade e unha organización eficaz dos procesos electorais de competencia estatal».
A rede está formada pola Xunta Electoral Central; Presidencia do Gobierno; Ministerio do Interior; Ministerio de Defensa; Ministerio de Asuntos Económicos e Transformación Dixital; Ministerio de Asuntos Exteriores, Unión Europea e Cooperación; a Axencia Española de Protección de Datos; e a Sociedade Estatal de Correos e Telégrafos, organismos e entidades que contaron este luns con representantes na reunión presidida polo ministro do Interior.